الطاحــــــــــــــــــــــونة / بقلم / رشـــــــــــــــــــاد الدهـــــــــــــــــــــــــشورى

الطاحونة

احساس سخيف 
انك تدور زى الطاحونة 
بدون طحين 
طول النهار زى التروس
زى المكن دايرين
والمخيف
انك متلاقيش حق الرغيف
وتحس انك غير مهم
شيء رخيص
وانك غريب
وملكش حق ف اى شيء
احساس رهيب
وكانهم فوق القانون
وكاننا نازلين من المزاريب
الأرض ليهم والقانون
وكأنهم من جنس تانى
مع انى انا
انا اللى زارع واللى قالع
واللى بانى
وانا اللى شقيان ليل نهار
طب لية ياغالية مغلبانى
علشان بحبك
علشان انا من طينتك الطاهرة اتخلقت
العيب فى مين
فى الشعب ولا زمرة الحاكمين
يا شعب عاشق جلادينة
يا شعب شارب من خرافة
ملبوس بالعفاريت
صبرت كتير على الظالمين
حرت الارض بضوافرى
فدان ورى فدان
وزرعت فيها القمح
طلع السبل عدمان
داير كما الطور متغمى
فى الساقية
اسقى العطاشى وانا عطشان
النور بصيص
وانا مشرخيص
انا زنبى اية
حكومة تقتلنى
ارهابى يقتلنى
ولما اصرخ فى وش الظلم تقتلنى
يا سارقى الارواح خافوا على روحكم
الروح اغلى من الدهب
والمصرى دة روحة عجب
صنعت تاريخ من الفنون
صنعت ادب
الروح حروف
تملا الكتب
لو حتى كان صاحبها مات
الروح غناوى للسكات
الروح حرير
حررها راح تفرح كتير
الروح لو كانت حجر
فتتها هتطلع شجر
يا قاتلين الروح
اية زنبة فلاح ينقتل م القهر
اية زنبة عامل ينقتل م الجوع
اية زنب طفل مريض
ينقتل موجوع
الروح وجود
اية زنبة جندى لسة واقف ع الحدود
بيحلم لااهلة يعود
الروح جرس بيرن لحظة اتحاد
الروح ادان من ربنا
يلم العباد
الروح بلاد
يا شعب نايم فى الرماد
الشر زاد
بيسلمونا لبعض
جلاد ورى جلاد
يا عصبة الخلابيص
خلبوص ورى خلبوص
هتطلعوا بلابيص
بلبوص ورى بلبوص
فى القبر مافيش رئيس ولا مرئوس
فى القبر دوود او سوس
ومافيش حساب مخصوص
القبر بينى وبينكم يا ظلمة
هبقى انا فى النور
وانتوا فى الضلمة
فى القبر فية العمل
مثل الجبل مرصوص
يا شعب عاشق للكفاح
يا شعب حى على الصلاح
انا روحى راحت م الصياح
سنين كتير مبعدهاش
سهران ومستنى الصباح
وانا صنعتى الكلمة
والكلمة كا النجمة
تضوى وتلمع ف البراح
....................................رشاد الدهشورى